Herrio natur taldeak 41 arte landatu ditu azken asteetan herriko hainbat gunetan, Orioko Udaleko lorezaintza enpresarekin elkarlanean. Hain zuzen, Abaromendiko eremuan, autobide azpiko inguruan eta Karela kiroldegiaren eta Mendibeltz futbol zelaiaren arteko berdegunean egin dituzte landaketak.
"Artea bertako zuhaitz espeziea da, hosto iraunkorra duena eta hazkunde motelekoa; horri esker, paisaian modu iraunkorrean txertatzen da artea, eta ingurunearekin bat egiten duenez, balio ekologiko eta paisajistiko handia du", azaldu du udalak zuhaitzaren inguruan.
Ekimen honen bidez, "tokiko biodibertsitatea indartu" nahi izan dute, "bertako espezieak lehenetsiz". Udalak, halaber, Herrio natur taldeak horrelako ekimenen bidez herriari egiten dion "ekarpen garrantzitsua" azpimarratu du.