Gaur, eguerdian, San Silbestre lasterketa egin dute Orion, herriko Kamel Ziani Atletismo Taldeak antolatuta, eta giro aparta egon da hitzorduan. 11:00etan eman diote hasiera probari, eta lehen zatian etxeko txikiek parte hartu dute lasterketan, adin tarte bakoitzera egokitutako ibilbidea osatuz. Beste behin, belaunaldi berriak ere indartsu datozela erakutsi dute haurrek.
Eguerdian, 12:00etan, hasi da helduen lasterketa, eta 250 lagunek baino gehiagok agurtu dute urtea korrika. Umore ona ez da falta izan urteko azken lasterketan, eta pozez helmugaratu dira parte-hartzaileak. Hala, gizonen kategorian, Aitor Etxeberria igeldotarra izan da azkarrena, 5 kilometroko ibilbidea 0:14:45 denboran osatuta; hiru segundora iritsi da Martin Iriondo (0:14:59) oriotar gaztea, eta 3. postuan sailkatu da Iñigo Exposito (0:14:59).
Emakumezkoen kategorian, berriz, lehen postua Ainhoa Murua zarauztarrarentzat izan da, helmugara 0:17:38 denboran iritsi baita. Bigarren postuan sailkatu da Ainhoa Usandizaga (0:18:23) oriotarra, eta hirugarren izan da Ioana Osa (0:18:36) ondarrutarra.