Emakumezkoen kasuan, bigarren edizioa izango da aurtengoa. Gainera, iaz Zarautzen jokatutakoa izan zen emakumeek harri baldarrekin inoiz jokatutako lehen txapelketa. Gizonezkoen kasuan, berriz, seigarren edizioa: "Txapelketa hau harrijasotze egutegian bere lekua egiten ari denaren seinale", azaldu du kirol elkarteak.
Azken urteetan emakumezkoen harrijasotzeak izandako goraldiaren ostean, gora egin du emakume partaideen kopuruak aurten: 6 izango dira txapelketan lehiatuko diren neskak, mutilak adina. Harrijasotzaileok Jai Txiki (63 kg) eta Mollarri (51 kg) harriak erabili beharko dituzte. Zazpi minutuko tanda bakar batean ahalik eta jasoaldi gehien eman beharko dituzte, harriak txandakatuta. Gizonezkoetan, aldiz, partaideek 7 minutuko tanda bat egin beharko dute Jai Txiki (117 kg) eta Mollarri (119 kg) harriak tartekatuz.
Sarrerak egunean bertan lehiatilan salduko dira, 17:00etatik aurrera. Hamar eurokoa izango da sarreren prezioa. Zarautz Kirol Elkarteko bazkide direnentzat, berriz, bost euro balioko du. 16 urtetik beherako ikusleek doan sartzeko aukera izango dute.
Baldintzak
Harrijasotzaileek eta bere laguntzaileek eskuak garbitu beharko dituzte txanda bakoitzaren aurretik. Jai Txiki eta Mollarri harriak txandakatuz jaso beharko dituzte 7 minutuko tandan. Harri batekin kale egin ezkero, ezingo da beste harrira pasa altxaldia asmatu arte, eta harrijasotzaile bakoitzak erabakiko du zein harrirekin hasi. Egungo marka onenak Karmele Gisasolak eta Mikel Lopetegik finkatu zituzten 2021ean, 25 eta 31 jasoaldirekin, hurrenez hurren. Txapeldunak igandean marka berria ezarriko balu, 300 euroko saria eramango luke.
Udane Ostolaza
16 urteko oriotarra, txiki-txikitatik harrijasotzen ibilia. Aurtengo martxoan Gazte Mailako Urrezko harrijasotze txapelketa irabazi zuen, eta maiatzean berriz bere marka hobetu du, 106 kiloko harri errektangularra jasota. Bere lehen parte hartzea izango da Zarauzko Bi Harri Txapelketan.
Gorka Etxeberria
27 urteko ortzaikarra, harri baldarrekin espezialista. 2018, 2019 eta 2021koen ostean, aurtengoa bere laugarren edizioa izango da. Iaz lortu zuen bere markarik onena, 19 jasoaldirekin.