Enaitz Oliden oriotarra garaile izan da ekainaren 13an Elgoibarko Uztarri Motzeko Trinitateetako II. Sarian. Bere idi pareak 41 plaza egin zituen 1.100 kiloko harria eta beste 7,5 kiloko gainkarga zeramatzala. Aratz Oliden anaiak bigarren postua irabazi du idi-proba berean, 38 plazako markarekin.
Oriotarrak Jesus M. Garaiarrekin neurtu ziren astelehenean. Bertan eskuratutako markari esker, Enaitz Olidenek 1.000 euroko ordainsaria, mantak eta txapela irabazi ditu. Bigarren emaitza onenagatik, Aratz Olidenek 900 euro jaso ditu.