"Normalean ur gehiegi botatzeagatik hiltzen dira etxeko landareak"

Jendearen gustuak aldatuko ziren denda zabaldu zenuenetik, ala?
Beti doaz aldatzen, modak izaten dira. Momentu honetan, adibidez, modan daude zuri, beltz, gris eta beix koloreak; ez dago beste ezer. Eta neuri ez zait gustatzen hain itxia egotea koloreei, eta kolore bila aritzen naiz. Andregaien lore-sortetan ere aldatu dira joerak; lehen beherantz erortzen ziren sortak zeuden modan, eta orain oso arraroa da horrelakoak egitea, sorta txikiak egiten dira.

Kolorez eta lurrinez inguratuta, lan atsegina dirudi. Gogorrena zer da?
Ordutegia. Gainerakoan, asko gustatzen zait nire lana, oso gustuko dut sortak eta apaingarriak egitea. Landareei kontu egitea ere asko gustatzen zait, etxean ere landare mordoa dut.

Azken hilabeteetan, derrigorrean etxe barruetara begira jarri dira herritarrak. Zuentzat pandemia ona izan da zentzu horretan?
Denak du bere alde ona eta txarra, eta guretzat ona izan da lanari begira. Jendea etxea txukuntzeko eta polit jartzeko gogoz ibili da, eta asko saldu da.

Oriotarrek zer gustu dituzte lore kontuetan?
Kolore horia asko saltzen da. Loreak erostera joaten naizenean, beti esaten dute: “Hemen dator oriotarra”. Kalanchoe landarea, esaterako, kolore desberdinetan ekartzen dute, baina hori kolorekoak han gelditzen zaizkie, eta nik erosten dizkiet guztiak. Kala horiak ere nik ekartzen ditut gehienbat.

Aiarren eta oriotarren artean desberdintasunik bai?
Batere ez.

Adinaren arabera aldatuko dira gustuak.
Asko. Adibidez, adineko batzuei orkideak ez zaizkie batere gustatzen; aldiz, oso gustuko dituzte anturium deiturikoak, eta gazteek, berriz, ez dute hainbeste erosten landare hori; errazago erosten dituzte orkideak. Kanporako landareetan ere, helduagoek geranioak erosten dituzte, eta gazteek ere bai azkenerako, ikusten dutelako oso politak gelditzen direla, baina beste kolore batzuk, edo beste estilo bat nahi izaten dute.
Udazkena iritsi zaigu. Orain zer landare tokatzen dira?
Geranioek, adibidez, urte osoa irauten dute, baina uda ondoren ez dituzu aurkituko haztegietan; ez dira saltzen. Orain ziklamenak, azaleak, neguko loreak daude. Udazkena beroa suertatzen bada sufritu egiten dute: iparraldean jarrita ondo egoten dira, baina hegoaldean jartzeaz, itxaron egin behar da pixka bat.
Aholkurik?
Kontuz urarekin; normalean itotzeagatik hiltzen dira-eta landareak.