Inguruko herrietan abendua gerturatzerako ekiten diote Gabonetako apaingarriekin herria argiztatzeari. Orion, ordea, San Nikolas jaiak pasa arte ez da Gabon usainik atzematen kaleetan. Oraingoan, ordea, herriko festak ez direnez ospatuko, abenduan sartzearekin batera ekin diote argien instalazioari. Herriko zubiaren azpian jarri dituzte lehenengo koloretako argiak, errioa argiztatzen. Datozen egunetan joango dira beste guztiak jartzen, pixkanaka, plazan, moila inguruan, Eusko Gudari kalean besteak beste.
Aurten, gainera, Udalak aldatu egin ditu Gabonetako argiak. Azken urteotan erabilitako irizpidea eta herriaren izaerarekin "lotuago" dauden argi eta apaingarriak jartzea erabaki du. Proposamen berria Jokin Eizagirre usurbildarrak egin du. Ez da herriarentzat egiten duen lehenengo proiektua, Xixario jatetxearen aurreko arrainen instalazioa ere berea baita. Ildo beretik joango dira Gabonetako argiak, "herriaren izaerarekin bat datozen" apaingarrien proposamena egin baitu.
Alokatu beharrean, erosi
Beste ezberdintasun bat ere badute apaingarri berriek. Izan ere, orain arte argi guztiak enpresa bati alokatzen zitzaizkion urtero urtero, baina berriak, erosi egin ditu Udalak, beraz, gerora ere Gabonetan eta bestelako jaietan erabilera emateko moduan izango dira. Aldaketa honen helburua, herria "modu berezian" apaintzea eta "erakargarri" egitea dela adierazi du Udalak, "bertakoentzat eta bisitarientzat".