Datorren ostegunean, urtarrilak 30, greba orokorra izango da Hego Euskal Herrian. Orioko mugimendu feministak ere bat egin du greba deialdiarekin; hala, herriko eragileei zein Eskubide Sozialen Kartaren parte diren sindikatuei eskatu diete "beren gain hartzeko greba feministaren aldarrikapenak".
Xaltxerak taldeak hainbat proposamen egin ditu greba orokorrari begira, aldarrikapen feministak erdigunera eramateko bidean. Besoko morea erabiltzeko proposamena egin du batetik, eta bestetik, "emakumeek doan egiten dituzten lanak ikusaraztera" egin du dei. Horretarako, amantalak leiho zein balkoietan eskegitzea proposatu du. "Greban egon ezin izan diren emakume guztiak" gogoan izateari ere jarri diote azpimarra mugimendu feministako kideek, "eremu sinbolikoak" sortzearen bidez. Esaterako, "etxeko langileak, presoak, zaintza lanak egiten egon diren emakumeak edota eraildakoak" aipatu dituzte, ostegunean greban egon ezingo dutenen artean.
Horretaz gain, ostegunerako "zaintza gune kolektiboak" sortzeko deia egin dute, "ardura emakumeen eta pentsionisten gain" erori ez dadin.
Zaintza, "ariketa kolektiboa"
Grebaren testuinguruan ere, Xaltxerak taldeak bi eskaera nagusi mahaigaineratu ditu: "bizitzaren jasangarritasun kolektiboa bermatzea eta elkarmenpekotasuna onartzea". "Zaintza lanei ez zaie oraindik ere baliorik ematen, eta emakumeen gain uzten dira. Zaintzen kudeaketaren ariketa kolektiboa egitea proposatzen dugu", gehitu dute.