Iragan asteburuan jokatu dute arraunketa olinpikoko Espainiako Outriggers Txapelketa, Castrelo Do Miñon (Ourense). Espainiako estatuko 73 arraunlari elkartek hartu dute parte aurtengo lehian; tartean, Orio Arraunketa Elkarteak. Sei ontzi aurkeztu ditu OAEk, eta Berdin-berdinak taldeko hiru ontzi ere aritu dira Castrelo Do Miñoko uretan.
Hiru kategoria bereiztu dituzte Espainiako Outriggers Txapelketan; hain zuzen, alebinena, infantilena eta beteranoena. Orioko lau ontzi izan ziren infantilen norgehiagokan, bat alebinenean eta beste bat beteranoenean. Hain zuzen, ondorengo arraunlariek hartu zuten parte:
- Alebinak (neskak): Naroa Manterola eta Edith Goenaga
- Infantilak (neskak), A ontzia: Ainhoa Garcia eta Haizea Gozategi
- Infantilak (neskak), B ontzia: Irati Garrido eta Maren Tapia
- Infantilak (mutilak), A ontzia: Oier Ikatzeta eta Ugaitz Astigarraga
- Infantilak (mutilak), B ontzia: Aimar Arruti eta Aratz Salsamendi
- Beteranoak (mutilak), A ontzia: Javier Puertas eta Dioniso Redondo
Seitik lau, finalera
OAEko sei ontzietatik lauk lortu zuten finalerako txartela; alebin neskek, infantil mutilen A zein B ontziek eta beteranoek. Hala, guztira bi domina etxeratzea lortu zuten: infantil mutilen kategorian Iktatzetak eta Astigarragak lortu zuten zilarrezko domina jaztea, eta beteranoen kategorian, Puertasek eta Redondok sari berdina eskuratu zuten. Seigarren egin zuten Arrutik eta Salsamendik; Manterolak eta Goenagak, aldiz, zazpigarren.
Berdin-berdinak taldeko kideei dagokienez, zazpi arraunlarik jokatu zituzten estropadak, eta garaikur bana jaso zuten txapelketa amaitzean.
Irudiak: Aupa Orio