Jon Azkuek jokatzen duen Bidasoa-Irun taldea Cuencaren aurka arituko da eskubaloiko Errege Kopako final-laurdenetan. Atzo izandako zozketan, Irungo klubean diharduten Azkue oriotarrari eta bere taldekideei izan zezaketen eszenatoki onena tokatu zitzaien. Izan ere, Alakanten apirilaren 5 eta 7 bitartean jokatuko den finalera arte ez dute Bartzelonarekin topo egingo -hasiera batean Kopa eskuratzeko faborito dira kataluniarrak-.
Cuencari gailendu eta final-erdietara iritsiz gero, talde irundarrak Granollers edo Ademar izango ditu arerio. Jon Azkueren Bidasoa-Irunek Asobal Ligan izandako emaitzak eta azken partidetan eskaini duen maila kontutan hartuta, aukera handiak ditu Errege Kopako finalera iritsi eta Bartzelonarekin kopa eskuratzeko lehian aritzeko.