Benito Lertxundiri gaur, ekainaren 21ean, emango diote Adarra saria. Hirugarren aldia da saria ematen dutela. Lehendabizikoa Mikel Laboari eman zioten; bigarrena, Ruper Ordorikari; eta hirugarrena, aurtengoa, Benito Lertxundiri emango diote. 20:00etan izango da ekitaldia, Donostiako Viktoria Eugenia antzokian.
Musikaren Nazioarteko eguna da gaur eta saria emateaz gain, kontzertua ere eskainiko du Lertxundik.
Juantxo Zeberio –pianoa, sintetizadorea–, Amaiur Cajaraville –baxua–, David Gorospe –bateria–, Angel Unzu –gitarra, bouzukia–, Gurutz Bikuña –gitarra–, Kutxo Ocho de Eribe –arrabita–, Pello Ramirez –eskusoinua, biolontxeloa–, Intza Unanue –koroak– eta Olatz Zugasti –harpa, teklatua, ahotsa– izango dira Benito oholtza gainean lagunduko dutenak.
Oroimenaren Oraina izeneko diskoa ardatz zuen biran ibili eta gero kontzertuak ematen jarraitzen du. Taula gainean inoiz baino erosoago sentitzen dela aitortu du Berrian egin dioten elkarrizketan eta kanta berriak idatzi dituen arren, oraindik disko berririk ez duela esku artean. Kanta horiek oholtzara eramaten dituela esan du, jendea kanta horietara egiten joateko, kantuak forma hartzeko.