Ikastaroak eta laguntzak Udal Elkartean

Urola Kostako Udal Elkarteko Enplegu Zentoran lana bilatzen laguntzeko ikastaroak egingo dituzte ekainean eta uztailean. Lana bilatzeko prozesuan eragina duten alderdiak eta baliabideak landuko dituzte ikastaro horietan:

• Enplegu webguneak: norbere profilaren arabera, curriculuma ezagutarazteko webgune nagusiak ikusiko dituzte ikastaro horretan. Ekainaren 17an gazteleraz emango dute ikastaroa eta uztailaren 22an euskaraz.
• Prentsa irakurketa: enplegua bilatzeko iragarki eta lan eskaintzen irakurketa landuko dute, ekainaren 24an, gazteleraz.
• Genero berdintasuna. Amatasun/aitatasuna eta lana: lan kontziliazio eta jardunaldi banaketaz hitz egingo dute ikastaro horretan. Lan murrizketak, eszedentziak, lan-kentzeak, ordaindutako baimenak... eta horiei dagozkien eskubide eta betebeharrak landuko dituzte. Uztailaren 15ean egingo dute ikastaroa, gazteleraz.
• Gazteentzako lan plana. Gazteentzako berme sistema: ekintzailetza eta gazte enpleguaren estrategiak landuko dituzte.Gazte Berme Sistema zer den eta horren onuradunak, sarbide baldintzak eta neurriak zein diren ezagutuko dituzte. Uztailaren 29an izango da euskaraz.

Ikastaro guztiak Udal Elkartearen egoitzan egingo dira eta izen-ematea egoitzan bertan, 943 89 08 08 telefonoan edo lanpoltsa@urolakosta.eus helbide elektronikoan egin daiteke.

Diru-laguntzak

Eusko Jaurlaritzaren eta Gipuzkoako Aldundiaren hainbat diru-laguntzen berri ere eman nahi du Udal Elkarteak, eskualdeko enpresa eta herritarrek eska ditzaten.

Landa-eremu izendatutako lekuetan dauden enpresentzat laguntza

Landaguneetan enpleguari eusteko edo enplegua areagotzen laguntzeko nekazaritzaz bestelako jarduerak sortu edo garatzea da laguntza honen xedea. Nekazaritza sektorearekin loturarik izan ez arren sektorea dibertsifikatzen lagunduko duten jarduerei, nekazaritzako elikagaien ekoizpenerako, eraldaketarako eta komertzializaziorako enpresen sorrera eta garapenari eta enplegu sorrera garbiari zuzendua dago diru-laguntza.

Aian edo Orioko hirigunetik kanpo dauden guneetan –horiek dira landa-eremuak– kokatutako enpresa eta jarduerek eska dezakete laguntza. Ekainaren 30a baino lehenago egin behar da eskaera eta URKOMEk laguntza eskaintzen du memoria eta eskabide orria prestatzeko 943 81 65 00 telefonoan edo urkome@urkome.eus helbidean.

Gipuzkoa industria 4.0: diagnostiko teknologikoak

Gipuzkoako enpresa txikiek diagnostiko teknologikoak egin ditzaten laguntzak emango ditu Foru Aldundiak. Enpresen lehiakortasuna hobetzeko estrategiak definitzeko laguntza teknikoa ematea da xedea eta 50 pertsona baino gutxiagori lana ematen dien enpresei dago zuzendua.

Kanpoko aholkulariek emandako aholkularitza zerbitzuen kostuak dira diruz ordainduko direnak eta gehienez kostuaren %50 edo 5.000 euro emango ditu Aldundiak. Ekainaren 8tik uztailaren 8ra bitartean eska daiteke laguntza hau Gipuzkoako Foru Aldundiaren laguntzen webgunean.

Global Training 2016 programa

Unibertsitate titulazioa eta goi-mailako lanbide heziketa duten gazteek atzerriko enpresa eta erakundeetan praktika ordainduak egiteko laguntza ematen du Global Training programak. Gazteak beren profil akademiko eta profesionalarekin lotutako jarduera eta proiektuetan arituko dira gutxienez 6 hilabetez.

1.358 eurokoa izango da beka –diru sarrerenzerga eta Gizarte Segurantza kendu beharko zaizkio– eta irailetik aurrera eta 2016 urtea amaitu aurretik hasi beharko dute egonaldiek. Hauek dira laguntza eskuratzeko bete beharreko baldintzak:

• Diplomatura, lizentziatura titulazioa edo goi-mailako lanbide-heziketa izatea.
• 30 urte bete gabe izatea 2016ko urtarrilaren 1ean.
• Euskal Herrian erroldatuta egotea gutxienez urtebetez, 2016ko urtarrilaren 1etik aurrera.
• Atzerrian, 6 hilabetetik gorako denboraldian, praktikarik ez egin izana beste beka baten bidez.
• Helmugako herrialdeko hizkuntzaren maila edo ingeles-maila bikaina edukitzea, erreferentzia C1 maila lizentziaturako eta B 2 Goi mailako lanbide heziketa titulua dutenentzat. Titulu hauen ziurtagiriak azken 4 urtetakoak izanez gero, ahozko eta idatzizko froga egitea salbuestazen du. Ziurtagiri hauek ez dutenei proba bat –ahozkoa eta idatzia– egingo da jakintzak zehazteko.
• Praktikak egiteko enpresak edo erakundeak eskatutako profilera egokitzea.
• Administrazio eta zigor arloan zigortuta ez izatea diru-laguntza edo laguntza publikoak eskuratzeko aukerarik gabe, eta horretarako gaitasunik gabe uzten duen legezko debekurik ere ez izatea.

Global Training beka eskaintzen duten herrialdeak, enpresak eta lan espezialitateak hemen aurki daitezke. Ekainaren 30ean amaituko da beka hori eskatzeko epea.

Hiru laguntza horiei buruz informazio gehiago nahi duenak 943 89 08 08 telefonoan edo enpresa@urolakosta.eus helbide elektronikoan.