Maiatzaren 27tik 29ra izango da aurten Orio Arraun Elkarteak antolatzen duen Garagardo Azoka. Laugarrenez, garagardo bereziak dastatzeko aukera izango da herriko plazan, eta baita egitarau zabalaz gozatzekoa ere. Atzo, maiatzaren 18an, aurkeztu zuten egitarau hori, Udaletxean. Arraun elkartearentzat diru sarrera izateaz gain, Garagardo Azokak herriari mugimendua ematen diola esan zuen Ibon Huhegun Arraun Elkarteko presidenteak, hori sinetsita urtero antolatzeko ardura gure hartuz jarraitu nahi dugu.
Urteroko eskema bera jarraituko du aurten ere azokak: hiru egunekoa izango da, ostiraletik igandera, eta garagardo bereziak eta jatekoa eskainiko dira Orioko plazan. Azken urteetan bezala, jakiak etxera eramateko aukera ere izango dute herritarrek.
Azoka irekitzeko, urtero bezala, Mirotza sariak emango dituzte ostiralean. Aurten, Idoia Etxeberria harrijasotzaileak eta Iñigo Martinez futbolariak jasoko dute sari bana. Azken hilabeteetan esku bakarrarekin eta bi eskurekin lortutako marken merituagatik omendu nahi dute Etxeberria. Bestalde, Martinezen ibilbidea ere saritu nahi dute, harrobia irudikatzen duelako eta bat egiten duelako elkartearen filosofiarekin.
Egitarau zabala egongo da asteburu osoan: kontzertuak, erromeriak, umore saioa eta kirola izango dira plazaren inguruan. Hona hemen egitaraua:
Maiatzak 27, ostirala
19:00 Irekiera ekitaldia eta Mirotza Sariak
19:15 Los Cañas talde oriotarraren kontzertua
22:00 Erromeria Bide Batez taldearekin
Maiatzak 28, larunbata
18:30 Erromeria Fan&Go taldearekin
20:45 Txapeldunen ligako finala pantaila handian
23:30 Erromeria Fan&Go taldearekin
Maiatzak 29, igandea
11:00 Beteranoen traineru estropada
13:00 Falcons de Vilafranca, Kataluniako giza dorreak
18:00 Buruz Buruko txapelketaren finala pantaila handian
19:00 Umore saioa Angel Alkainekin