Bi oriotar Herri People saioan

Saskibaloi partidaren ondoren, gaueko 22:15ean, iazko denboralditik ETBn ikusten ez genuen Herri People saioak hartu zuen pantaila. Apustuen inguruan aritu ziren eta, pasa den denboraldian bezala, oraingoan ere Ibon Gaztañazpik aurkeztu zuen saioa.

Mamia ere ez da aldatu. Euskal pertsonaien bilduma osatuko dute, hainbat ogibidetan aritzen diren herritarren istorioak ezagutzera emanda. Atzokoan, esaterako, Iñaki Oliden –oriotarra–, Mikel Mindegia, Iñaki Perurena, Aimar Olaizola, Joxe Mari Olasagasti eta Izeta –aiarra– gertutik ezagutu ahal izan genituen. Kirolari horiez gain, artekariak ere elkarrizketatu zituen Gaztañazpik. 

Kirolaren eta apustuaren arteko lotura estua dela frogatu zuen atzo oriotarrak. Frontoi eta probaleku batean ere izan zen, apustuak egiten. 40 euro jokatu zituen Iribarria eta Merinoren alde. Apustu horrekin 200 euro irabazteko aukera zuen arren, galdu egin zuen jokatutakoa. Idi demetan ere egin zuen apustua: Elosegik 52 plaza baietz, 60 euro. Bigarren honetan ere ez zuen asmatu. 

Apustuak eta elkarrizketak ikusi ahal izateko, atzoko saioa osorik ikusteko: http://www.eitb.tv/eu/bideoa/5414/

Bi oriotar Herri People saioan lanean

Ibon Gaztañazpi ez da EiTBko Herri People saioan lanean ari den oriotar bakarra. Iker Gurrutxaga ere lan taldeko kide da. Erredaktore lanetan dabil Gurrutxaga. Pertsonaiak lotzen ditu, grabaketetara joaten da, informazioa biltzen du... Hortaz, bi dira saioan lan egiten duten oriotarrak.