Ate joka daude Orioko Gazte Festak. Hilaren 25etik 27ra izango dira, eta bertako bi ekitaldi garrantzitsuenetan parte hartzeko izen ematea zabalik da dagoeneko. Larunbatean izango den paella lehiaketako txartelak salgai daude Kala karin, Errustan eta Kolon Txikin, 12 euroren truke. Hiru egun besterik ez dira geratzen tiketak erosteko, hilaren 23an itxiko baita izen ematea.
12 euro horien barruan sartuko da paella egiteko osagaiak –arroza, olioa, tipula, gatza eta baratxuria–, bazkaria –paella, edaria, postrea, kafea eta kopa– eta Gazte Festetako kamiseta.
Gazte Festetan garrantzia berezia duen beste ekitaldietako bat baltsa jaitsiera da. Igandean, 16:30ean, izango da baltsa karrera. Baltsa egin nahi duenak baina tokirik ez duenak, gaztetxea erabili dezake ontziak egiteko. Hortaz, Gazte Festetako antolakuntzarekin jarri kontaktuan –facebook bidez, esaterako– eta gaztetxea irekitzeko hitzordua finkatuko ahal izango duzue.