Magiaz beteko du plaza ostegunean Asier Kidamek. 1994an hasi zen bere pasioa ogibide bihurtzen, eta ordutik milaka plazatan bota ditu hauts magikoak eta milaka lagunekin batera oihukatu ditu hitz magikoak. Ostegun honetan oriotarrekin eta oriotarrentzat egingo du magia gasteiztarrak.
Mago batek belarritik txanpona atera zionean sortu zitzaion magiarekiko arra. Interesak bultzatuta Espainiako Ilusionismo Elkartean sartu zen 17 urte zituela. Handik bi urtera, 19 urterekin, mago profesionala bilakatu zen. Ordutik hamaika eszenatokitan egin du lan: telebistako platoetan, ezkontzetan, ikastetxeetan, antzokietan, herriko plazetan...
Azken hau izango du osteguneko eszenatoki, Orioko herriko plaza. Arratsaldeko 19:30etan hasita, haurrentzako magia ikuskizuna eskainiko du Kidamek.