Betiko Market izena duen arren, bertan aurkituko duzuena ez da betikoa izango. Sormena bor-borka izango den azoka antolatu du Kimmuko lan taldeetako batek, non eltzean hainbat diziplinatako sortzaileak sartuko dituen. Uztarketa horrek, orain arte behintzat, sortzaileak eta erosleak asetu ditu. Orion ere eltzeak sormenez gainezka egin dezan nahi dute antolatzaileek.
Larunbat honetan izango da azoka, abuztuaren 15ean. Artista, diseinatzaile, sortzaile eta denda berriak ezagutzeko aukera izango da Orioko plazan; eta, iaz lehenengoz antolatu zen Gure Bazterrak festibalerako motorrak berotzeko eguna izango da. Aurten, berriz ere izango da musikaz blaituko duen jaialdia Orion. Azaroaren 28an izango da, larunbatarekin, eta ekimena bigarrenez egingo dela ospatzeko antolatu dute asteburuan Betiko Market azoka.
Larunbat honetakoaz gain, beste bi aldiz egingo da azoka Orion, abuztuaren 30ean eta irailaren 12an. Euskal Herriko sortzaileen topagune izango da, hortaz, Orioko herriko plaza. Batean ala bestean postua jarri nahi duenak 685329991 telefonora deitu beharko du.