Zaleen babesa eskatu zuten. Mendibeltzera gerturatzeko eta Orioko taldeari animatzeko deia egin zuten. Eta, zaleek, ondo erantzun zuten. Oriok bere betebeharra bete zuen, partida irabazi zuen; baina, ligako titulua lortzea ez zegoen beren esku. Euskaldunak galdu egin behar zuen, eta ez zen horrela izan, 1-2 irabazi zuen.
Denboraldi bikaina egin duzte oriotarrek eta biribiltzen saiatuko dira Mutrikuren aurkako play offa irabazten. Beren helburua, zuzenean ez bada, play offa jokatuta Erregional Ohorezko Mailara igotzea da.
Gainontzeko kategorietan denetariko emaitzak izan ditu Oriok. Infantil txikietan, Eibarren kontra, 5-0 galdu zuten eta jubeniletan, Amara Berriren kontra, 7-2 irabazi zuten. Jubenilek hirugarren postuan jarraitzen dute eta datorren astebukaeran Tolosari irabaziz gero, bigarren postua lortuko dute.
Galdu duten beste partida ohorezko jubenilena da, 3-2 galdu baitzuten Santo Tomas Lizeoaren aurka. Denboraldi gogorra izan da oriotarrentzat, baina, azkenean, lortu dute mailari eustea.
Kadeteetan berdinketa lortu zuen Oriok. Beasainen kontra jokatu zuten partida asteburuan, eta, Kopako finalerdietara sailkatzea jokoan zegoenez, penaltietan erabaki behar izan zen hori. Penaltietan Oriok irabazi egin zuen eta finalerdietara sailkatzea lortu zuten. Usurbilen aurka jokatuko dute aste-bukaera honetan finalaurrekoa.