%2019.27.54.png)
Aukerak dituzte oraindik. Ez dago ezer erabakita. Hori bai, ez dute erraza izango, Euskaldunak taldeak norgehiagoka galdu beharko baitu eta Oriok hiru puntuak eskuratu. Partida garrantzitsua da larunbatean, arratsaldeko 17:30ean, Mendibeltzen jokatuko dutena. Irabazi eta lidertza eskuratuz gero ez baitute igoerako play offa jokatu beharko.
Oraindik saiatuko gara, noski, azaldu digu Iñigo Exposito Orioko jokalariak. Azken jardunaldian egin beharrekoa egiten ahaleginduko gara, eta, lortzen ez badugu, play offa irabaztera joango gara. Larunbat honetan jokatuko dute erabakigarria den partida, etxean, 17:30ean, Urnietaren aurka. Zuzendaritza taldeak oriotarrak partida ikustera animatu nahi ditu: jendearen babesa eskatzen dugu partidurako.
Galdu ala irabazi, denboraldi bikaina egin dute oriotarrek. Harro egoteko modukoa izan da, ia partida guztiak irabazi baitituzte. Lider izan dira jardunaldi askotan zehar, baina azken jardunaldietan lidertza galdu zuten. Ondoren berriz berreskuratu arren, lehengo asteko partida 3-1 galdu zuten Lehengokoak taldearen aurka eta lidertza galdu zuten. Bigarren daude orain sailkapen orokorrean, eta, jardunaldi baten faltan, oraindik lider bukatu dezakete liga. Karanbola ez da erraza, berak irabazi eta Euskaldunak galdu egin behar baitu, baina dena da posible.
Gainontzeko emaitzak gazi-gozoak
Ohorezko jubeniletan berdindu egin zuten 2-2 emaitzarekin Beti Gazteren aurka. Unai Azkue eta Ander Etxeberriak sartu zituzten golak. Puntu garrantzitsua lortu zuten oriotarrek, Beti Gazte taldea bigarren sailkatua baita.
Jubeniletan irabazi egin zuen Oriok. Txapeldunen fasean hirugarren jarraitzen dute hiru puntu horiek lortu ostean oriotarrek. Bi golak Leire Manterolak sartu zituen.
Kadeteetan kopa jokatzen ari dira oriotarrak. 2-2 berdindu zuten Ostadarren aurka Imanol Azpiroz eta Eneko Genovaren golei esker. Final zortzirenak zirenez penaltietara jokatu zuten final-laurdenetarako txartela. Penaltietan 4-2 irabazi zuten. Final-laurdenetan etxean jokatuko dute, Mendibeltzen, Beasainen aurka.