Saskibaloiko Gipuzkoako Finala jokatuko da larunbatean, 10:30ean. Donostiako Mons kiroldegian, Intxaurrondon, izango da. Orioko infantil mutilak Zarauzkoen aurka lehiatuko dira, biak ZAST klubeko taldeak. Hortaz, bai ala bai, irabazten duenak irabazita, ZASTek irabaziko du.
Asteburuan Azpaitian irabazi eta gero, Gipuzkoako beren kategoriako finalerako txartela lortu zuten oriotarrek, azaldu du Iker Gurrutxagak, eta gaineratu du: kasualitatez, beste txartela ZASTeko beste taldeak lortu du. Hortaz, finala, ZASTeko bi taldek jokatuko dute. Bi taldeetan lehenengo urteko jokalariak dira gehiengoa eta bigarren urtekoen ligan ari dira jokatzen, zehaztu du Gurrutxagak.
Iaz bi taldeetako jokalariekin osatutako taldeak irabazi zuen Gipuzkoako Txapelketa. Hortaz, aurten, batzuk errepikatu egingo dute, bigarrengoz Gipuzkoako Txapeldun izango dira. Dena den, irabazi edo galdu, Orioko saskibaloia osasuntsu dagoela garbi geratuko da.
Gainontzeko taldeak ere maila onean
Kadete neskek berdinketa hirukoitz bat eta gero ezin izan dute lauko finalerako txartelik lortu, baina bukaera arte izan dituzte aukerak. Gutxigatik ez dira finalera iritsi. Infantil neskak, ordea, lortu dute lauko finalerako txartela. Datozen asteetan jokatuko dute aipatutako finala.