Pertsona mundialak ditugu atsegin lelopean, neguko matrikulazio kanpaina hasi dute Zaragueta Herri Eskolan. Berehala irekiko da ikasleak matrikulatzeko epea, eta hori baino lehen, ate irekien eguna antolatu dute. Eskolako hezkuntza proiektua ezagutzeko eta instalazioak bisitatzeko aukera izango dute gurasoek egun horretan, urtarrilaren 31n, larunbatean.
11:00etatik 13:00etara egingo dira ate irekiak. Lehen orduan euskaraz aurkeztuko zaie hezkuntza proiektua gurasoei, eta 12:00etan gazteleraz. Gero, irakasleen eskutik bisita gidatua egingo dute, eskola barrutik ezagutzeko. Haurrentzako ere salto-gela, margo tailerra eta informatika tailerra irekiak egongo dira. Guztia amaitu eta gero, hamaiketakoa egingo dute jangelan.
Matrikulatzeko garaia
Otsailaren 2an irekiko da matrikulazio epea, eta 13ra arte egongo da zabalik. Haur Hezkuntzarako, Lehen Hezkuntzarako eta Derrigorrezko Bigarren Hezkuntzarako epea bera izango da.
Bere seme-alabak Zaraguetan matrikulatu nahi duenak egun horietan 9:00etatik 17:00etara egin ahal izango du, eskolan bertan. Gurasoen NAN-a eta familia liburua dira matrikula egiteko beharrezko dokumentuak.
Informazio gehiago nahi duenak 943894052 telefonoan edo www.zaragueta.net webgunean aurki dezake.