Larunbateko bazkalostea Astigarragan igaro zuten Orioko erregional preferente kategoriako futbolariek. 15:45ean hasi zen Mundarro taldearen aurkako lehia, Zarkumendegi futbol zelaian. Joseba Areizaga eta Iñigo Agirreren golei esker 1-2 hartu zuten mendean Astigarragako taldea.Bost garaipen, berdinketa bat eta galdutako partida bat; horiek dira Orioren orain arteko emaitzak. Guztira 16 puntu eskuratu dituzte eta sailkapen orokorrean bigarren postuan daude, lidergotik hiru puntura.
Jubeniletan 2-0 irabazi zuen Orioko taldeak Real Unionen aurka. Mendibeltzen jokatutako partidan lortutako hiru puntuekin sailkapen orokorreko zortzigarren postua eskuratu dute. Liderra bost puntura daukaten Beti Gazte taldea da.
Liderraren aurka jokatu zuten Orioko jubenil neskek, Urnietaren kontra. Larunbat arratsaldean jokatu zuten, 16:00etan, eta markagailuak ez zuen aldaketarik izan 90 minutuetan. 0-0 emaitzarekin bukatu zen partidua, puntu ona Orioko neskentzat. Sailkapen orokorrean hirugarren postuan daude, 9 punturekin; bigarren, Amara Berri 10 punturekin; eta lehen postuan, Urnieta 13 punturekin.
Kadeteetan bi talde ditu Oriok. Bata, bosgarren multzoan dago; bestea, seigarren multzoan. Urnietaren eta Vasconiaren aurka jokatu zuten, hurrenez hurren. 4-0 galdu zuten Orioko futbolariek Urnietako zelaian eta 3-2 irabazi zuten, etxean, Vasconiaren aurka.
Infantilen kasuan bi goleko aldearekin galdu zuten neskek. Etxean jokatu zuten eta 3-5 emaitzarekin amaitu zen partida. Azken aurreneko postuan daude oriotarrak, oraingoz ez baitute punturik eskuratu.
Kimuek irabaztea lortu zuten, gol bateko aldearekin. 3-4 emaitzarekin etxeratu ziren Elgoibartik Oriora. Hau da, oraingoz, eskuratu dituzten lehen hiru puntuak eta sailkapen orokorrean seigarren postura igo dira.
Datorren asteko partiduak
Erregional preferente taldeak Dunboa-Eguzki taldearen aurka jokatuko du; gizonezko jubenilek, Pasaian izango dute partidua: emakumezko jubenilek, Zarautzen kontra; kadete mailan 5. multzoko taldeak, Lehenengokoak taldea izango du nor baino nor eta, seigarren multzoko taldeak, Ostadar taldea izango du aurrez aurre. Infantil nesken taldeak Amaikak bat taldearen kontra jokatuko du.
Bestalde, asteburu honetan hasiko dira kimu eskolako gazteak txapelketarekin. Oriok talde bat izango du kategoria horretan eta lehen partida Vasconiaren aurka izango dute.