Gurasoek sanpedroei begira proposamen bat jarri zuten mahai gainean: San Pedro Party. 12-16 urte bitarteko haurrentzat disko festa.
Ideia polita iruditu zitzaien festa batzordeko kide guztiei, baina inork ez zuen aurrera eramateko ardura hartu nahi. Proposamena mahai gainean geratu zen, kili-kolo. San Pedro Jaien atzerako kontaketan, berriz ere heldu zioten gaiari. Pena ematen zien horrelako ekimena albo batera uztea eta ez egikaritzea, hortaz, Orain taldeak eta hainbat gurasok festa antolatzeko ardura hartu zuten. Festa batzorde buruaren babesa ere zuten.
Gazteek zirenez parte hartzaileak, gazteek izan behar zuten protagonista: bai festan, bai antolakuntzan. Berekin, nerabeekin, bildu ziren. Ideia ona iruditu zitzaienez, buru belarri ekin zioten proiektua aurrera ateratzen. Antolakuntzara batu ziren gazteak eta bien arteko lanaren fruitu izan zen festa.
Data erabaki zuten: sanpedroetan, ekainaren 30ean. Eta asko eta asko izan ziren bertaratzea erabaki zutenak. Olatun sarrera ugari saldu ziren, 205 hain zuzen. Euro baten truke tiketa eta kontsumizio bat doan hartzeko aukera zuten nerabeek.