Martxoaren 28an, asteazkenean, ohiko bilkura egingo du Orioko Udalbatzak udalbatzarren aretoan. Ohiko orduan, 20:00etan, hasiko da eta azken bilkuretako akten zirriborroak onartu ondoren, honako gai zerrenda jarriko dute mahai gainean:
- Onartzea, egoki bada, Orioko kultur etxeko atezain lanpostuaren lanaldia aldatzea.
- Adjudikatzea, egoki bada, Orioko Udaleko Gazteria departamentuko Ametsa Gaztelekua kudeatzeko zerbitzuaren lehiaketa publiko bidezko kontratazioa.
- Berrestea, egoki bada, Orioko Abaromendi kalea 38ko etxabeko 2. zenbakidun merkataritzako lokalaren salerosketako eskritura publikoa, Maider Sukia Etxeberriarekin sinatutakoa, eta ahalmen zabala ematea Beñat Solaberrieta Albizu alkateari eskritura hori sinatzeko.
- Onartzea, egoki bada, Orioko Arraun Elkartearen udal instalazioak Arraunketa eta Piraguismoko teknifikazio-zentro bat instalatzeko handitu eta berritzeko obrak exekutatzeko kontratua aldatzeko espedientea.
- Behin betikoz onartzea, egoki bada, Orioko Kasko Historikoa Birgaitzeko Plan Bereziaren 3. Hirigintza Jarduketa garatzeko hitzarmen urbanistikoaren eranskina; eranskina Lurra, Promocion y gestion SL merkataritza-entitateak aurkeztu du Udalaren aurrean.
- Onartzea, egoki bada, Orioko Udaleko Kontratazio Mahaia osatzea, izaera iraunkorra izango duena bere eskuduntzako kontratu guztietarako.
- Onartzea, egoki bada, Orioko Kale Nagusia 29an dauden udal jabetzako bi etxebizitzen salerosketa eta ahalmen zabala ematea alkateari salerosketako dokumentu pribatuak eta eskritura publikoak sinatzeko, Orioko Udalaren izenean.
- Onartzea, egoki bada, baldintza ekonomiko-administratiboen orria eta baldintza teknikoen orria, Orioko Arraunketako eta Piraguismoko teknifikazio-zentroaren hornidura kontratatzeko: sarreren kontrola, intrusoen detekzioa, telebista-zirkuitu itxia eta megafonia.
- Onartzea, egoki bada, Orio eta Igeldo-Donostia arteko errepidean ezpondak berritzeko obren exekuziorako proiektu teknikoa eta obra horiek publizitaterik gabeko prozedura negoziatu bidez kontratatzeko baldintza administratibo partikularren orria.
- Bat egitea, egoki bada, Urola Kostako Udal Elkartearen Zuzendaritza Batzordeak 2012ko martxoaren 13an egindako ohiko bilkuran onartutako hizkuntz politika orokorrarekin.
- Dagozkion erabakiak hartzea, egoki bada, Bateragune epaiketa dela-eta, Bildu udal talde politikoak gaiari buruz egin dituen eskarien haritik.
- Bat egitea, egoki bada, Nafarroa Bizirik Orion taldeak Nafarroako konkistari (1512-2012) buruz aurkeztu duen adierazpenarekin.
- Dagozkion erabakiak hartzea, egoki bada, 2012ko apirilaren 8an egingo den Aberri Eguna dela-eta, Orain udal talde politikoak gaiari buruz egin dituen eskarien haritik.
Bukatzeko eskari eta galderak egiteko aukera izango da.