Iaz Gipuzkoako 18. Klasika hartu zuten Aiako errepideek eta herriguneak. Aurten, berriz, duela bi urte bezala, Gipuzkoako Itzuliari hasiera emango zaio gurean. Ekainaren 21ean izango da proba, ostiralarekin, arratsaldeko 18:30ean hasita. Jubenilek egiten duten Gipuzkoako Itzuliko lehendabiziko etapa izango da Aiakoa. Ibilbide gorabeheratsua izango dute, 2011n izan zutenaren antzekoa: kalbariotan hasi eta plazan bukatu.
Lehenengotik azkenekoraino, banan-bana irtengo dira txirrindulariak, 30 segundoro. Probak trafikoan aldaketak eragingo ditu herrian. Horrela, Arginmuñotik hasita herrigunea erabat itxita egongo da arratsaldeko 17:30etik 20:30ak bitartean. Armendi-Gainetik Andazarrate aldera edo Zarautza joan nahi dutenentzat ez da arazorik izango. Udalak herritarrei eskatzen die, herri barrura sartu edota atera nahi izanez gero ordutegia errespetatzeko; edo, bestela, herriko sarreran uzteko kotxea.
Horrez gainera, herriguneko aparkaleku nagusia ere ez da erabilgarri izango 15:00etatik aurrera, eta, ondorioz ezingo da autorik utzi bertan.
2.530
Metro
Hori da txirrindulariek egin beharreko
distantzia. kalbariotan hasi, Arginmuñora arte
joan, buelta hartu eta Lardizabal eskolara.
Handik eskuineko bidea hartu eta Armendi-Gain ingurura joango dira; bertatik
Benta Berriraino jaitsi eta plazan bukatzen.