Balearen Festaren harira antolatu diren ekitaldiak gaur, astelehena, uztailak 15, hasiko dira. Xabier Alberdi historialari zarauztarrak Ezkutuan dagoen Orioko itsas ondarea hitzaldia egingo du 19:00etan, Salatxo aretoan. Gipuzkoako itsas ekonomiari buruzko tesia idatzi zuen Alberdik eta tesi horren lanketan, Oriori buruz ikasteko aukera izan zuen datu interesgarriak jakinaraziko ditu.
Mahai-ingurua bertan behera
Bestalde, Bisiguaren Festako ekitaldien artean, asteazkenean, uztailaren 17an, mahai ingurua egitekoa zen arrantza ondareari eta arrantza azokei buruz Leandro Azkue, Eusko Jaurlaritzako Arrantza zuzendaria; Begoña Gangoiti, Bermeoko udaleko turismo teknikaria; eta Ibon Gaztañazpi kazetaria hitz egitekoak zirela. Egun eta ordu berean, ordea, Donostian traineruen Gipuzkoako Txapelketa jokatuko da, beraz, bertan behera utzi dute.