Orioko ikasle gaztetxoenek danborraren erritmora ospatu zuten San Sebastian eguna atzo, urtarrilaren 20an. Ohiturari jarraituz, danborradak egin zituzten bi ikastetxeetan.
Kiroldegian bildu ziren Orioko Herri Ikastolakoak arratsaldez, Haur Hezkuntzako 3 urteko haurretatik hasi eta Lehen Hezkuntzako 2. mailakoetaraino. Biboteak margotuta eta berek egindako txapelak buruan zituztela, Donostiako Martxa eta beste hainbat abesti jo zituzten jendez betetako harmailen aurrean.
Zaragueta Herri Eskolan, berriz, pasilloetan zehar eta eskolako patioan jardun ziren Haur Hezkuntzako ikasle eta irakasleak. Alai aritu ziren ibilbidean, gainontzeko ikasleak geletatik ateraz. Saioa amaitzeko Donostiako Martxa azken aldiz jo zuten eskolako sarrera nagusian.