Gipuzkoako Foru Aldundiak autobus zerbitzua hobetzeko prozesua jarri zuen martxan 2013an, herritarren proposamenak jasotzeko bilera irekiekin. Jasotako 3000 proposamen ingurutik %75a onartuta egin duten behin behineko hobekuntza plana aurkezteko, eta horri buruzko iritziak jasotzeko, Gipuzkoako udalerrietan bigarren bilera fasea egiten ari dira. Orion, martxoaren 19an, asteazkenean egingo dute bilera, Kultur Etxean.
Bilera honetan Aldundiaren proposamena aurkeztuko zaie herritarrei, aldaketak eta onartutako ekarpenak azaltzeko. Bestalde, berriz ere iritzia emateko aukera izango du herritarrak, eta baita udalak ere. Horretarako, bilera irekiez gain, www.garraioahobetzen.net webgunea eta etxeetara zabalduko diren hainbat eskuorri erabil daitezke. Azken horiek, Udaletxeko harreran jarritako postontzian bota ahal izango dira.
Landutako proposamenean, hainbat hobekuntza pentsatu dituzte Urola Kostarako: Donostia eta Zumarragako ospitaleetara joateko zerbitzua hobetzea, garraio aldaketak ahalbidetzeko ordutegiak egokitzea, herri txikienen loturak bermatzea...
Jasotzen diren iritziekin behin betiko proposamena landuko da, urrian aurkeztuko dena eskualdeko bileratan. Hori onartzean, lehiaketara atera eta 2015erako zerbitzu berria martxan egongo dela aurreikusten du aldundiak.