Iaz asfalto gainean aritu zineten lehian. Aurten lur gaineko modalitatean ere ibiliko zarete.
Bai. Dagoeneko hasi dugu Espainiako Lur Gaineko Txapelketako denboraldia.
Zer dela eta animatu zarete pauso hori ematera?
Denbora luze generaman honen bila. Aurten babesleak animatu egin dira eta horregatik eman dugu pausoa.
Zertan desberdintzen da orain artekotik?
Orain arte Euskal Herriko Txapelketan hartu dugu parte, asfaltoan. Eta hasi berri dugun txapelketa espainiar estatu mailakoa da, eta lur gainean. Aurrera pauso bat da, asko ikasiko dugu txapelketa honetan.
Orain arte ez zineten sekula lur gainean ibili?
Pare bat lasterketa egin genituen, baina apenas ezer ez.
Desberdintasun handia al dago bi modalitateen artean?
Bai, oso handia. Ez dauka zerikusirik. Gidatzeko erak zeharo desberdinak dira. Lur gainean irrist egiten zoaz denbora guztian.
Autoa ere kondizio horietara egokitutakoa izan beharko duzuela pentsatzen dut...
Aurten lehenengo aldia denez horrelako baldintzen aritzen garena, talde handi baten zerbitzuak kontratatu ditugu, kotxe eta guzti.
Ekin diozue txapelketari. Pasa den astean izan zenuten lehen lasterketa, Murtziako Lorcan. Zer nolako sentsazioak izan zenituzten?
Oso-oso gustura sentitu ginen. Guk lehiatzen dugun kategorian hirugarrenak izan ginen.
Zein kategoriatan lehiatzen zarete?
Grupo N deitzen den kategorian. Maila horretan hirugarrenak izan ginen eta sailkapen orokorrean hamabigarrenak. Guztira 78 autok hartu zuten parte, beraz, oso emaitza ona iruditzen zaigu lortutakoa.
Hasiera onari jarraipen ona emateko gogotsu, beraz.
Oraindik asko hobetu dezakegula iruditzen zaigu. Kilometroak egin ahala hobetzen joango garela uste dugu eta horretan ahaleginduko gara.
Eta sekula ez bazarete lur gainean ibili, nola ikasi duzue? Behin eta berriz ibilita?
Hori da. Aurrekontu oso handia izanez gero, proba pribatuak egiten dira, norberarentzatko errepide batzuk itxita-eta. Baina ez da gure kasua. Guk praktikatu egiten dugu ikasteko. Gure aurrekontua justua da. Ozta-ozta iristen zaigu lasterketetan parte hartzeko, hortaz, pixkanaka joaten gara ikasten.
Hala ere ez duzue asfalto gaineko lehia albo batera utzi, ezta?
Momentuz Euskal Herriko igoera txapelketan parte hartzen jarraituko dugu.
Iazko kotxe berdinarekin?
Bai, baina hobekuntza batzuk egin dizkiogu. Batez ere motorrean egin dizkiogu hobekuntzak. Lur gainerako prestatu dugun kotxea Mitsubishi Evo 9 bat da, eta asfaltorako iazko BMW berritua.
Beti izango da zer hobetu...
Beti, bai.
Aldaketa horiek zuek egiten dituzue?
BMWan dena guk egiten dugu. Gauza ia guztiak bezala, egiten eta egiten ikasi dugu. Horrez gain, mekaniko oso on bat daukagu taldean, Ruben Martinez.
Zuek ere orain mekaniko lanetan hasi zarete, rallyetatik kanpo, ezta?
Hala da, bai. Lasterketetan ikasitako guztiari daukagun esperientzia gehitu, eta denon eskura jarri nahi izan dugu.