Ostiral iluntzea. Euria goitik behera eta hotza Orion. Plazan, estalpean, giroa goxo. Musika zuzenean DJ Arosen eskutik, rally txapelketetako irudiak, eta Eizmendi eta Olasagastik aurtengo denboraldian erabiliko duten autoaren burrumba hotsa.
Probetan parte hartuko duten autoaren diseinu berria aurkeztu zuen bikoteak, BMW M3 eraberritua. Orain arte eta denboraldi honetan ere alboan izango dituztenak ekarri dituzte gogora: gurasoak, familia, lagunak eta babesleak.
Auto eraberrituarekin talde eraberritua izango da, denboraldi honetatik aurrera rally talde solidarioa izango direla azaldu baitu Eizmendik. Lortzen dituzten sarien erdia gizarte arloan lan egiten duten elkarteei emango diete. Aurten, Atzegi elkartearentzat izango da lortutako diruaren erdia. Horrez gain, lagunduko dituzten elkarteetara autoarekin bisitak egiteko konpromisoa hartu dute.